Gwamnan Jihar Zamfara, Dauda Lawal, zai halarci wani babban taron horaswa kan dabarun shugabanci da ƙarfafa tsarin mulki, a wani...
Gwamnan Jihar Zamfara, Dauda Lawal, zai halarci wani babban taron horaswa kan dabarun shugabanci da ƙarfafa tsarin mulki, a wani ɓangare na ƙoƙarin gwamnatinsa na inganta tafiyar da harkokin mulki a jihar.
Za a gudanar da taron ne a ranakun 30 da 31 ga watan Maris, 2026, a Jami’ar Coventry da ke Ƙasar Birtaniya, ƙarƙashin jagorancin Cibiyar Nazarin Kasuwanci da Al’umma Masu Ƙarfi, wato Centre for Resilient Business and Society.
A cikin wata sanarwa da mai magana da yawun gwamnan jihar, Sulaiman Bala Idris, ya fitar, ya bayyana cewa taron yana samun goyon baya daga tsarin tallafin cibiyoyi na Hukumar Bincike da Ƙirƙire-Ƙirƙire ta Ƙasar Birtaniya (UKRI).
Sanarwar ta ƙara da cewa, wannan taro na nuna haɗin gwiwar da ke ƙara ƙarfafawa wajen samar da mafita ta hanyar bincike domin inganta shugabanci, juriyar tsari da ci gaban al’umma a cibiyoyin jihar Zamfara.
A cewar sanarwar, ana sa ran gwamnan zai tashi zuwa Birtaniya a ranar Lahadi domin halartar wannan taro na kwanaki biyu, wanda zai haɗa manyan masana daga sassa daban-daban na duniya, masu tsara manufofi da kuma ƙwararru a fannin shugabanci domin tattauna hanyoyin gina tsayayyun cibiyoyi da magance matsalolin al’umma ta hanyar amfani da bincike da bayanai.
Muhimman batutuwan da za a tattauna sun haɗa da jagoranci mai juriya a yanayi mai cike da ƙalubale da ƙarancin albarkatu, ƙarfafa tsarin kuɗi, ƙirƙire-ƙirƙire a ɓangaren gwamnati, sarrafa sauye-sauye, da kuma amfani da bayanai cikin gaskiya da ɗa’a wajen tafiyar da mulki.
Gwamnan zai halarci taron tare da manyan jami’an gwamnati da suka haɗa da Sakataren Gwamnatin Jihar, kwamishinoni, masu ba da shawara na musamman, da kuma Babban Sakataren Hukumar Bunƙasa Fasahar Sadarwa ta Jihar Zamfara (ZITDA).
A wani ɓangare na taron, gwamnan da tawagarsa za su yi wata mu’amala kai tsaye da ɗaliban digiri na biyu da ke gudanar da bincike (PGR), inda za a tattauna kan rawar bincike wajen tsara manufofin gwamnati, tare da jaddada yadda shirin “Ceto Jihar Zamfara” mai ginshiƙai shida ke bayar da darussa a aikace.
Wannan zama zai ba da dama ga tattaunawa mai zurfi kan yadda bincike zai wuce ƙa’idar rubuce-rubuce ya zama kayan aiki na zahiri wajen yanke shawara da samar da sakamako mai amfani ga al’umma.
Halartar Zamfara a wannan taro na nuna ƙudurin gwamnati wajen haɗa bincike da amfani da bayanai a cikin tafiyar da mulki, domin tallafa wa manufofin shirin “Ceto Jihar Zamfara” wanda ya mayar da hankali kan tsaro, zaman lafiya, noma, lafiya, ilimi, ababen more rayuwa da kuma bunƙasa tattalin arziki.
No comments