2027: Gwamna Dauda Lawal Ya Jinjina Wa Naɗin Sanata Yari A Matsayin Darakta-Janar Na Kamfen Ɗin Tinubu

Gwamnan Jihar Zamfara, Dauda Lawal, ya taya Sanata Abdul’aziz Yari Abubakar murnar naɗa shi a matsayin Darakta-Janar na Kwamitin...

Gwamnan Jihar Zamfara, Dauda Lawal, ya taya Sanata Abdul’aziz Yari Abubakar murnar naɗa shi a matsayin Darakta-Janar na Kwamitin Yaƙin Neman Zaɓen Tinubu/Shettima na 2027, yana mai cewa wannan naɗi ya dace da ƙwarewarsa wajen jagoranci da tsara harkokin siyasa.

Jam’iyyar APC ta sanar da kafa Kwamitin Yaƙin Neman Zaɓenta na Shugaban Ƙasa na 2027 a ranar Asabar, inda ta naɗa tsohon Gwamnan Zamfara, Sanata Yari, a matsayin Darakta-Janar.

A cikin wata sanarwa da Mai Magana da Yawun Gwamnan Zamfara, Sulaiman Bala Idris, ya fitar a ranar 22 ga Agusta, 2026, Gwamna Lawal ya bayyana naɗin Yari a matsayin shaida ce ta irin ƙwarewarsa da cancantarsa wajen jagoranci da tafiyar da manyan ayyuka.

Gwamnan ya ce naɗin ba wai kawai abin farin ciki ba ne, har ma mataki ne da ya dace wanda zai taimaka wajen tabbatar da nasarar sake zaɓen Shugaba Bola Ahmed Tinubu a 2027.

Lawal ya ce, a madadin al’ummar Jihar Zamfara, yana miƙa godiya ga Shugaba Tinubu bisa zaɓar ɗansu, tsohon gwamna kuma Sanatan Zamfara ta Yamma, Abdul’aziz Yari Abubakar, domin jagorantar yaƙin neman zaɓen Tinubu/Shettima na 2027.

Ya bayyana naɗin a matsayin abin alfahari ga al’ummar Zamfara, yana mai cewa hakan zai ƙara ɗaga gwiwar mambobin APC tare da ƙarfafa ƙudurin su na cimma manufofin jam’iyyar.

Gwamna Lawal ya kuma ce kasancewar Sanata Yari a kan gaba wajen jagorantar kamfen ɗin shugaban ƙasa zai bai wa APC damar yin wa ’yan Najeriya bayanin manufofinta da kuma ƙara yaɗa ajandar Shugaba Tinubu a tsakanin masu zaɓe.

Haka kuma, Gwamna Dauda Lawal ya taya tsoffin gwamnonin Zamfara, Ahmed Sani Yarima, Mahmuda Aliyu Shinkafi da Bello Matawalle, murnar samun muƙamai daban-daban a cikin Kwamitin Yaƙin Neman Zaɓen Shugaban Ƙasa na APC.

Ya ce ƙwarewa da gogewarsu a harkokin shugabanci za su taka muhimmiyar rawa wajen samun nasarar yaƙin neman zaɓen, tare da ƙarfafa ƙoƙarin jam’iyyar na tabbatar da sake zaɓen Shugaba Tinubu a 2027.