Gwamnatin Jihar Zamfara ta amince da ƙarin kashi 95 cikin 100 na albashin ma’aikatan lafiya a faɗin jihar, inda sabon tsarin biy...
Gwamnatin Jihar Zamfara ta amince da ƙarin kashi 95 cikin 100 na albashin ma’aikatan lafiya a faɗin jihar, inda sabon tsarin biyan kuɗin ya fara aiki daga ranar 7 ga Satumba, 2026.
Gwamnatin jihar ta ce, sabon tsarin albashin ya yi daidai da tsarin albashin ma’aikatan lafiya da Gwamnatin Tarayya ta amince da shi, musamman Consolidated Health Salary Structure (CONHESS), wato Tsarin Haɗaɗɗen Albashin Ma’aikatan Lafiya.
Shugaban Ma’aikatan Gwamnatin Jihar Zamfara, Shehu Baraya, ne ya sanar da ƙarin albashin a cikin wata takardar umarni da aka fitar ranar 10 ga Satumba, 2026, mai lamba HS/Z/001/54/VOL.II.
An aika takardar ga manyan jami’an gwamnatin jihar, ciki har da Sakataren Gwamnatin Jiha, kwamishinoni, masu ba da shawara na musamman, sakatarorin dindindin da shugabannin ma’aikatu, sassa, hukumomi, hukumomin gudanarwa da kwamitoci.
Gwamnatin ta ce an sake duba tsarin albashin ne a wani mataki na inganta harkokin kiwon lafiya a jihar.
A cewarta, ƙarin albashin na da nufin ƙarfafa ma’aikatan lafiya, inganta jin daɗinsu da kuma samar da ingantattun yanayin aiki.
Ta ce ana sa ran ƙarin albashin zai ƙara wa ma’aikatan ƙwarin gwiwa da himma, tare da inganta ayyukansu da ingancin harkokin kiwon lafiya.
Sai dai gwamnatin ta buƙaci ma’aikatan lafiya su mayar da martani ga wannan ƙarin albashi ta hanyar ƙara jajircewa, ƙwarewa da sadaukarwa wajen gudanar da ayyukansu.
Ta kuma umarci ma’aikatan da su riƙa kiyaye lokutan aiki na hukuma, bin ƙa’idar ladabtarwa da kuma yin aiki bisa dokoki, ƙa’idoji da ɗabi’un aikin gwamnati.
“Gwamnati na yaba da ci gaba da jajircewa da sadaukarwar ma’aikatan lafiya, kuma tana sa ran za su ƙara himma wajen gina ingantaccen tsarin kiwon lafiya mai saurin amsa buƙatun jama’a a Jihar Zamfara,” in ji takardar.
Gwamnatin ta kuma umarci shugabannin ma’aikatu, sassa da hukumomi da su sanar da ma’aikatan da abin ya shafa sabon tsarin albashin, tare da tabbatar da cewa an aiwatar da dukkan manufofin sake fasalin albashin.
Takardar ta ƙunshi sabon tsarin albashin CONHESS na asali da ya shafi matakai da digiri daban-daban, tare da alawus ɗin haɗarin aiki ga ma’aikatan lafiya masu aikin jinya kai tsaye da waɗanda ba sa gudanar da ayyukan jinya kai tsaye.
A sabon tsarin alawus ɗin haɗarin aiki, ma’aikatan lafiya masu aikin jinya da ke matakin albashi na 1 zuwa 5 za su karɓi N15,200, yayin da takwarorinsu da ba sa aikin jinya kai tsaye za su karɓi N14,250.
Ga ma’aikatan da ke matakan albashi na 6 zuwa 12, alawus ɗin zai kasance N30,400 ga masu aikin jinya, yayin da waɗanda ba sa aikin jinya kai tsaye za su karɓi N28,500.
Ma’aikatan da ke matakan albashi na 13 zuwa 15 kuma za su karɓi N32,300 a matsayin ma’aikatan lafiya masu aikin jinya, yayin da waɗanda ba sa aikin jinya kai tsaye za su karɓi N30,400.
No comments